‍ජ්‍යොතිෂයට පුහු අභියෝග එල්ල කරමින් දේශීයත්වය වැනසීමේ ජාත්‍යන්තර කුමන්ත්‍රණයක්?

                                                      
මාධ්‍යවේදී තිලක් සේනාසිංහ මහතා විසින් 2014 දෙසැම්බර් 7 වැනි ඉරිදා ලක්බිම පුවත්පතට ලියන ලද ‘හැකිනම් ඉදිරි තුන් මාසයේ ප්‍රබලතම සිදුවීම් දහය රටට හෙළිකරන්න’ මැයෙන් වූ ලිපිය මම ද කියැවීමි. එයට එසැනින්ම පිළිතුරු ලිපියක් සම්පාදනය කරන්නට සිත් වුව ද එය පමා කරන ලද්දේ සේනාසිංහ මහතාගේම වචනවලින් කිවහොත් ‘සුපිරි තරු’  ගණයේ ‍ජ්‍යොතීර්වේදියකු එයට පිළිතුරක් සපයනු ඇතැයි යන්න සිතුණු බැවිනි. එහෙත් එබඳු සුපිරි තරුවක් නොවූ ‍ජ්‍යොතීර්වේදිනියක වන නිර්මලා අතපත්තු මහත්මිය ‍ජ්‍යොතීර්වේදීන්ගේ පාර්ශ්වය නියෝජනය පසුගිය දෙසැම්බර් 14 ‘ඉරිදා ලක්බිම’ පුවත්පතට ලිපියක් ඉදිරිපත් කොට තිබිණ. ‘ඉදිරි තුන් මාස තුනේ රටේ ප්‍රබලම සිදුවීම් දහය කීමට විශ්ව ශක්තිකරුවන්ට අභියෝග නොකරන්නේ ඇයි?’ යන මැයෙන් ලියැවී තිබූ එය සෑහෙන දුරකට සතුටුදායක පිළිතුරක් යැයි සඳහන් කළ හැකිය. ඇය එම පිළිතුරෙන් වැඩිදුරටත් පවසා සිටියේ විවිධ මාධ්‍ය ඔස්සේ ‍ජ්‍යොතීර්වේදීන් ලෙසින් පෙනී සිටිමින් ‍ජ්‍යොතීර්වේදය ඔස්සේ සිරුරේ අධික රුධිර පීඩනය කොලෙස්ටරෝල් මට්ටම පවා කියන්නට හැකි යැයි පවසන කපටි කයිරාටිකයන් ඉලක්ක කොට මෙම අභියෝගය එල්ල කරන ලෙසය. මාධ්‍ය ඔස්සේ ‍ජ්‍යොතීර්වේදීන් ලෙස අති මහත් ප්‍රසිද්ධියට පත්ව සිටින බොහෝ බොරුකාර පුද්ගලයන්, ජනතාව රවටමින් දහස් ගණනින් මුදල් උපයා ගන්නා බව රහසක් නොවේ. අප කරා ද පැමිණෙන මෙවැනි ඇතැම් පුද්ගලයන්ගේ දුක්ගැනවිලි අපි ද බොහෝ අසා ඇත්තෙමු.
මාධ්‍යවේදී තිලක් සේනාසිංහ මහතා තුළ යම් යම් විෂයන් සම්බන්ධ තරමක දැනීම් අවබෝධයන් ඇති බව අපට පසක් වී තිබේ. එහෙත් අපේ රටේ ‍ජ්‍යොතීර්වේදයේ ඉතිහාසය සම්බන්ධයෙන් ඔහු ‘දැනුම් හාමතකින්’ පෙළෙන බව නොකියාම බැරිය. එනිසාම ඔහු ලිපියේ ‍ජ්‍යොතීර්වේදීන් වර්ග කොට ඇති ක්‍රමයේ අඩුපාඩු රාශියක් ඇති බව ද පෙනෙන්ට තිබේ. ඔහුගේ ලිපියේ එක්තරා තැනක, ‘රජ මැඳුරේ සිට පච ගහ යට දක්වා’ සිටින සියලුම ‍ජ්‍යොතීර්වේදීන්ට තම අභියෝගය විවෘත බව සඳහන්ව තිබේ. 
‍ජ්‍යොතීර්වේදයට අප රටේ ද ඇත්තේ දීර්ඝ ඉතිහාසයකි. සමාජ පසුබිමත් සමග ‍ජ්‍යොතීර්වේදීන්ගේ තරාතිරම ද වෙනස් වෙයි. අප රටේ රාජාණ්ඩු පාලනයක් පැවැති අතීතයේ රජවාසල නැකත් රාළ නමින් හැඳින්වුණු රජ මැදුරේ රාජකීය නැකැත් කරුවකු සිටි බවට බොහෝ ඉතිහාස කරුණු තිබේ. ඔහුගේ රාජකාරිය වූයේ පූර්ණ කාලීනවම රජ මැදුර ඇසුරේ වෙසෙමින් රජතුමාට, රජ පවුලට සේම ‍පොදුවේ රටට සිදුවන යහපත අයහපත පිළිබඳ ග්‍රහචාරයන්
නිරීක්ෂණය කොට ඒ පිළිබඳ අනාවැකි පළකිරීම සහ පිලියම් යෙදීමය. මහනුවර යුගය වන විට රජවාස‍ලේ නැකැත්කරු භූමිකාව අතිශය ප්‍රසිද්ධියට පත් වූ බවට සාක්ෂි තිබේ. මහනුවර යුගයේදී මෙම රජවාසල නැකැත්කරුවා වෙතින් පෙර කී රාජකාරීවලට අමතරව සිංහල අවුරුදු නැකැත් සීට්ටු පිළියෙළ කිරීම ද සිදු වූ බවට ඓතිහාසික වාර්තා තිබේ. එය රජතුමා අතට පත්කිරීමෙන් පසු අණබෙරකරුවෝ මෙම නැකත් සීට්ටුව රට පුරා ප්‍රචලිත කරවති. ඉන්පසු ගම් මට්ටමේ නැකත්කරුවෝ ඒවා සටහන් කරගනිති. අවුරුදු සිරිය ගම්මාන තුළට පිවිසෙනුයේ මේ සංසිද්ධියත් සමගය.
රාජකීය නැකැත්කරුවා මෙන් නොව ගම්බද නැකැත්කරුවන් පූර්ණ කාලීනව ‍ජ්‍යොතීර්වේදී කටයුතුවල නිරත වූවෝ නොවෙති. බොහෝ විට මෙවැනි නැකැත්කරුවන්ගේ ජීවිකාව වූයේ ගොවිතැන, කම්මල් කටයුතු හෝ රන් භාණ්ඩ තැනීම ආදියයි. නමුදු, හඳහන පරීක්ෂා කිරීම විවාහ නැකැත්, ගෙට ගෙවැදීම්, අත්තිවාරම් කැපීම, මල්වර නැකැත් සෑදීම වැනි ගැමියන්ගේ සාමාන්‍ය ජීවිතයේ ‍ජ්‍යොතිෂ අවශ්‍යතා සියල්ල ඉටු වූයේ ඔහුගේ අතිනි. එහෙත් ‍ජ්‍යොතීර්වේදයේ ඇති උතුම් බව සලකා එකල ඒ සඳහා මිල නියම කිරීමක් ද නියම නොකිරිණ. එහෙත් තමන් හමුවට එන ගැමියා දෙන තුටු පඬුරකින් හෝ බවබෝග ස්වල්පයකින් සෑහීමට අතීත ‍ජ්‍යොතීර්වේදීනට හැකියාවක් තිබිණ. අතීත වැඩවසම් සමාජයේ විවිධ වෘත්තීන් අනුව කුල බෙදා පැවැතිය ද ‍ජ්‍යොතීර්වේදීන්ට පමණක් වෙන් වූ විශේෂ කුලයක් නොතිබිම ද විශේෂත්වයකි. මෙවැනි ගම් මට්ටමින් සිය කටයුතු කරගෙන යනු ලබන ‍ජ්‍යොතීර්වේදීහු වර්තමානයේ ද සිටිති. ඔවුන්ගෙන් සමහරකු  වර්තමානයට ගැළපෙන සේ කුඩා කාර්යාලයක්, දැන්වීම් පුවරුවක් වැනි දේ එකතු කරගෙන ඇතත් ඔවුන් සිදුකරන්නේ අතීත නැකැත්කරුවන් විසින් කළ කාර්යභාරයමය.  යම් වෙනසකට ඇත්තේ අතීතයට වඩා එම සේවය මිල මුදල් මත පදනම් වීම පමණි. එසේ නොමැතිව ඉදිරි ජනාධිපතිවරණයෙන් දිනන්නේ කවුද? ලබා ගන්නා ඡන්ද ප්‍රතිඵලය කුමක්ද ? ඉදිරියේ සිදුවිය හැකි රටේ ප්‍රධානම සිදුවීම් කුමක්ද? වැනි දෑ පිළිබඳ සොයා බලන්නට ඔව්හු ඉදිරිපත් නොවෙති ඊට හේතුව එවන් සියුම් එමෙන්ම වෙහෙසකර කටයුත්තක් සිදු කිරීමෙන් ඔවුනට කිසිදු ප්‍රතිලාභයක් ලබාගත නොහැකි වීමය.  
නමුත් නූතන මාධ්‍ය කරලියේ අනේක විධ ආටක - නාටක බහු රූ කෝලම් ඉදිරිපත් කරන සිඟාල කුලයේ සටකපට ‍ජ්‍යොතීර්වේදීහු ඉහත සඳහන් අව්‍යාජ අවිහිංසක ‍ජ්‍යොතීර්වේදීන්ගේ ගණයට ඇතුළත් නොවෙති. ‍ජ්‍යොතීර්වේදිනී නිර්මලා අතපත්තු මහත්මිය පවසා ඇති පරිදි ඉදිරියේ පැවැත්වෙන ක්‍රිකට් තරගයක පිල් දෙක ලබාගන්නා ලකුණු පිළිබඳව පවා අනාවැකි පළකරන්නේ ඉහත සඳහන් සට කපට ‍ජ්‍යොතීර්වේදීන්ම බව පෙනේ. අතපත්තු මහත්මිය පවසන අන්දමට මෙවැනි සියුම් නිර්ණාත්මක අනාවැකි පළකිරීම ‍ජ්‍යොතීර්වේදයෙන් කළ නොහැකිය. 
මේ දිනවල බොහෝ දෙනකුගේ අවධානය ඉදිරි ජනාධිපතිවරණය කෙරෙහිය. එහෙත් ඉන් දිනන්නේ කවුද යන්න පිළිබඳ අනාවැකියක් පළකිරීමට ප්‍රධාන ජනාධිපති අපේක්ෂකයන් දෙදෙනාගේ ජන්ම පත්‍ර පමණක් නොසෑහේ. ඒ සඳහා ශ්‍රී ලංකා කේන්ද්‍රය සේම ඔවුන්ගේ භාර්යාවන්ගේ දරුවන්ගේ ජන්ම පත්‍ර ද උපයෝගි කර ගනිමින් අතිශය තුලනාත්මක අධ්‍යයනයක් කළ යුතුය. මගේ වැටහීම අනුව ඒ සඳහා මීට මාස හය හතක් වත් ගත වේ. එහෙත් ඉදිරි ජනාධිපතිවරණයේ ප්‍රධාන ප්‍රතිවාදියාගේ භූමිකාව දේශපාලන කරලියට පැමිණ තවම මසක්වත් ඉක්ම ගොස් නැත. එහෙත් ඒ සඳහා විවිධ ‍ජ්‍යොතීර්වේදීන්ගේ අනාවැකි පළ කිරීම් මාධ්‍ය මගින් නොඅඩුවම අසන්නට දකින්නට ලැබේ.
‍ජ්‍යොතීර්වේදය මගින් රටතොට අනාවැකි පළකරන බව පවසමින් මහජනතාව මුලා කරන කපටි ‍ජ්‍යොතීර්වේදීන්ගේ නිරුවත ලොවට හෙළි වූ හොඳම අවස්ථාවක් වන්නේ 2004 වසරේදී ඇති වූ සුනාමි ඛිෙදවාචකයයි. ඒ පිළිබඳ කිසිදු ‍ජ්‍යොතීර්වේදියෙකු කිසිවක් පවසා තිබුණේ නැත. යමකු ප්‍රසිද්ධ මාධ්‍යයකින් එසේ පවසා තිබුණේ නම් අදාළ සාක්ෂි ද සමග එම අනාවැකිය නැවත ඉදිරිපත් කරන මෙන් මම ඔවුන්ට විවෘත අභියෝගයක් කරමි. තමන් කියූ දෙයක් කිසි දින වැරදී නැතැයි වෙළෙඳ දැන්වීම් ඔස්සේ පුරසාරම් දෙඩූ එක් ‍ජ්‍යොතිෂ පුවත්පතක් සුනාමිය ඇතිවීමට පෙර සතියේ මුල් පිටුවේම සිරස්තලයකින් පළ කළ පවසා තිබුණේ ‘ස්වභාවික විපත් දැන් ඉතින් නිමයි‘ යන්නය. ප්‍රධාන පෙළේ ‍ජ්‍යොතීර්වේදීන් යැයි පවසා ගනු ලබන අයගේ නිරුවත මෙවැනි දේවලින් මනාව පැහැදිලි වන අවස්ථා බොහොමයකි. අවශ්‍ය නම් ඔවුන්ගේ නම් ගම් ද සහිතව ඒවා ඉදිරි කලාපයකින් අනාවරණය කළ හැකිය. 
එමෙන්ම සේනාසිංහ මහතාගේ මෙම අභියෝගය පිළිබඳව ද අවසාන වශයෙන් යමක් කිව යුතුය. ඔහුගේ මෙම අභියෝගය පසු පස දේශීයත්වය වනසන ජාත්‍යන්තර කුමන්ත්‍රණයක් තිබිමේ පැහැදිලි අවකාශයක් පවතී. එනිසා සේනාසිංහ මහතා සම්බන්ධ වී වැඩ කටයුතු කරන හේතුවාදය වෙනුවෙන් පෙනී සිටින විවිධ සංගම් පිළිබඳව හා ඒවායේ වත්කම් හා ඒවාට ලැබෙන විදේශ ආධාර පිළිබඳව ද පුළුල් අවධානයක් යොමු කළ යුතු යැයි මම සිතමි. එවිට සේනාසිංහ මහතා වැන්න වුන් මෙසේ ‍ජ්‍යොතීර්වේදයට පහර ගසන්නේ කාගේ ‘බළල් අතක්’ ලෙස ක්‍රියාකරමින් දැයි දැන ගැනීමට අප කාට කාටත් හැකි වනු ඇත.

ජ්‍යොතීර්වේදී වෑවලගේ විමලසිරි